މިއީ އިންޒާރުގެ ރަނގަބީލެކެވެ. ގައުމީ އެއާރލައިން ބާރުވެރިނުކޮށް ތިބެވޭކަށް ނެތެވެ
- Avaitors Maldives
- 7 minutes ago
- 2 min read
މެދުއިރުމަތީގައި ހިނގަމުންދާ ހަމަނުޖެހުންތަކުގެ ސަބަބުން، ދުރުގައި ހިނގާ ކަންކަމުގެ އަސަރު ދިވެހިރާއްޖެއަށް ކުރާ މިންވަރު އަނެއްކާވެސް މިވަނީ ހާމަވެފައެވެ . ފާއިތުވި މަދު ދުވަސްކޮޅުގެ ތެރޭގައި، ގަލްފުގެ ބޮޑެތި އެއާލައިންތައް ކަމަށްވާ އެމިރޭޓްސް، ޤަޠަރު އެއާވޭސް، އަދި އިއްތިޙާދު އެއާވޭސް އިން ވަނީ އެސަރަޙައްދުގެ މަސްލަޙަތު އޮތް ގޮތުން ދަތުރުތައް މެދުކަނޑާލާފައެވެ
މީގެ ނޭދެވޭ އަސަރު ރާއްޖެއަށް ކުރަން ފެށީ ވަރަށްވެސް އަވަހަށެވެ. އެގޮތުން، ހަނގުރާމައިގެ ފުރަތަމަ ތިން ދުވަހުސް ތެރޭގައި ރާއްޖެއަށް އައި ފަތުރުވެރިންގެ އަދަދު 41 އިންސައްތަ ވަނީ ދަށަށް ގޮސްފައެވެ
ފަތުރުވެރިކަމަށް ބަރޯސާވެފައިވާ ޤައުމަކަށް މިއީ ހަމައެކަނި ހިސާބު އަދަދުތަކެއް ނޫނެވެ. މިއީ ލިބޭ އާމްދަނީ މަދުވެ، ވިޔަފާރިތަކަށް ދަތިވެ، ވަޒީފާގެ ބާޒާރަށް ނޭދެވޭ އަސަރު ކުރާނެ ކަމެކެވެ. އޮތް ބޮޑު ނުރައްކަލެކެވެ. މި ހާލަތުން ހާމަވެގެންދަނީ ރާއްޖޭގެ އިގްތިސޯދުގެ ނާޒުކުކަމެވެ. އަދި ބައިނަލްއަޤްވާމީ ދަތުރުފަތުރުގައި ބޭރުގެ އެއާލައިންތަކަށް މާބޮޑަށް ބަރޯސާވެފައި އޮތް އޮތުމުން އެނާޒުކުކަން އިތުރަަށް ބޮޑުވެފައިވާ މިންވަރެވެ
ބޭރުގެ ހަބްތަކަށް ބަރޯސާވުން
ގިނަ އަހަރުތަކެއް ވަންދެން ރާއްޖެއިން ބަރޯސާވެފައިވަނީ މެދުއިރުމަތީގެ އެއާލައިންތަކުގެ ބޮޑެތި ނެޓްވޯކްތަކަށެވެ. މި އެއާލައިންތަކުން ވިލާތާއި، އޭޝިއާ، އެފްރިކާ އަދި އެމެރިކާގެ ޤައުމުތަކުން އެމީހުންގެ މައި ހަބްތައް މެދުވެރިކޮށް ރާއްޖެއާ ގުޅުވައިދެއެވެ
އާދައިގެ ހާލަތްތަކުގައި މިއީ ވަރަށް ރަނގަޅު މަގެކެވެ. ނަމަވެސް، ރިސްކު ބޮޑު ނިޒާމެކެވެ. އެ ސަރަޙައްދުތަކަށް މައްސަލައެއް ދިމާވެ، ދަތުރުފަތުރުތަކަށް ބުރުއަރާއިރަށް އޭގެ ސީދާ އަސަރު ވަގުތުން ރާއަޖެއަށް ކުރެއެވެ. އެއީ ރާއްޖެއަށް ދަތުރު ކުރާނެ އިތުރު މަގުތަށް މަދުވުމާއި، މިފަދަ ހާލަތެއް ދިމާވިޔަސް، އެ ހުސްކަން ފޫބައްދާނެ ޤައުމީ ފެންވަރުގެ ޤާބިލުކަމެއް ރާއްޖޭގައި ނެތުމުންނެވެ
މިހާރު ދިމާވެފައިވާ ކަންކަމުން ސާފުކޮށް އެނގިގެންދަނީ، ރާއްޖެއާއި ގުޅުމެއް ނެތް ކަންކަމުގައި އެހެން ގައުމުތަކުން ނިންމާ ނިންމުންތަކުން ރާއްޖެއަށް ސިދާ ކުރާ އަސަރުގެ ބޮޑު ކަމެވެ
ޤައުމީ އެއާލައިންގެ ލިމިޓެޑް ކެޕޭސިޓީ
މިވަގުތު ރާއްޖޭގެ ޤައުމީ އެއާލައިން، މޯލްޑިވިއަންގައި ބައިނަލްއަޤްވާމީ ދަތުރުތައް ކުރުމަށް ބޭނުންކުރެވެނީ ވަރަށް މަދު ބޯޓުތަކެެވެ. އެގޮތުން، ސަރަޙައްދީ އަދި ދުރު ރާސްތާ ދަތުރުތަކަށް އެ އެއާލައިނުން މިހާރު ބޭނުން ކުރަނީ ދެ ބޯޓެވެ
ބޭރުގެ އެއާލައިންތަކުން ރާއްޖެއަށް ކުރާ ދަތުރުތައް މެދުކަނޑާލާ ހާލަތްތަކުގައި، އުފެދޭ ޑިމާންޑާ އެއްވަރަށް ޚިދުމަތް ދިނުމުގެ ޤާބިލުކަން މިވަގުތު މޯލްޑިވިއަންއަކަށް ނެތެވެ. އަދި ދުރު ރާސްތާގެ މަންޒިލްތަކަށް ފުޅާ ދާއިރާއެއްގައި ދަތުރުތައް ކުރުމާއި، ކުއްލި ހާލަތްތަކުގައި ފަތުރުވެރިކަމުގެ މުހިންމު މާކެޓުތަކަށް ކުރަން ޖެހޭ ދަތުރުތައް މެދުނުކެނޑި ކުރިއަށް ގެންދެވޭ ވަރުގެ ފްލީޓެއް މޯލްޑިވިއަން އަކު ނެތެވެ
މީގެ ނަތީޖާއެއްގެ ގޮތުން، ބޭރުގެ އެއާލައިންތަކުން ދަތުރުތައް ހުއްޓާލުމާއެކު، ރާއްޖެއާއި ދުނިޔޭގެ އެހެން ޤައުމުތަކާ ދެމެދު އޮންނަ ވައިގެ ދަތުރުފަތުރުގެ ގުޅުމަށް ވަގުތުން ބުރުއަރައެވެ
ބޯޓުފަހަރު ނެތް އެއާޕޯޓްތައް
ފާއިތުވި އަހަރުތަކުގައި ރާއްޖޭގެ އެކި ކަންކޮޅުތަކުގައި އެއާރޕޯޓުތައް ހަދާ ތަރައްޤީކުރުމަށް ބޮޑެތި ހޭދަތަކެއް ވަނީ ކޮށްފައެވެ. މިއީ މުހިންމު މަޝްރޫޢުތަކެއް ނަމަވެސް، ހަމައެކަނި އެއާޕޯޓްތަކެއް ހުރުމަކުން ދަތުރުފަތުރުގެ ގުޅުން ކަށަވަރެއް ނުކުރެވޭނެއެވެ. ބޭނުންވާވަރަށް ބޯޓުފަހަރު ނެތްނަމަ، ދަތުރުތަކަށް ބުރޫއަރާ ހާލަތްތަކުގައި ފަތުރުވެރިން ރާއްޖެއަށް ގެނައުމަކީ އެއާޕޯޓްތަކުގެ ރަންވޭތަކުން އެކަނި ކުރެވޭނެ ކަމެއް ނޫނެވެ
މިހާރު ފެންނަން އޮތީ ބޮޑު ނުބައްދަލުވުމެކެވެ. އެއީ އެއާޕޯޓްތައް ތަރައްޤީކުރުމުގެ މަސައްކަތް ބާރުމިނުގައި ކުރިއަށްދާއިރު، ޤައުމީ އެއާލައިން ކުރިއެރުވުމުގެ ދުވެލި މަޑުވުމެވެ. އެއާރޕޯޓުތަކާއި އެއްވަރަށް ބޯޓު ފަހަރު އިތުރު ނުވުމެވެ. ރާއްޖެއަށް ފަތުރުވެރިން ގެނައުމުގައި އަދިވެސް ބޮޑަށް ބަރޯސާވާން ޖެހިފައިވަނީ ބޭރުގެ އެއާލައިންތަކަށެވެ
ފަތުރުވެރިކަމާއި ދިވެހި އިގްތިސޯދުގެ މައި ލޭނާރު ކަމަށް ވާއިރު ވައިގެ ދަތުރުފަތުރަކީ ފަތުރުވެރިކަމުގެ ބިންގަލެވެ. މިއީ ބޭރު ފައިސާ ވަންނަ، އެތައް ހާސް ވަޒީފާއެއް އުފައްދާ، އަދި ރަށްތަކުގެ ތަރައްޤީއާ ގުޅިފައިވާ އެންމެ މުހިންމު ދާއިރާއެވެ. އެހެންކަމުން، ވައިގެ ދަތުރުފަތުރަކީ ހަމައެކަނި އެއްތަނުން އަނެއްތަނަށް މީހުން އުފުލައިދޭ ވަސީލަތެއްގެ ގޮތުގައި ބެލުމުގެ ބަދަލުގައި، އެއީ ޤައުމީ އިޤްތިޞާދީ ސަލާމަތާއި ރައްކާތެރިކަމުގެ މުހިންމު ބައެއްގެ ގޮތުގައި ދެކެންޖެހެއެވެ
.ވަރުގަދަ ޤައުމީ އެއާލައިނެއް އޮތުމަކީ ޤައުމަށް އަންނަނިވި ފައިދާތައް ލިބޭނެ ކަމެކެވެ
• ދުނިޔެއަށް ދިމާވާ ބޮޑެތި ކާރިސާތަކުގެ ވަގުތުގައާއި ދަތި ހާލަތްތަކުގައިވެސް، ރާއްޖެއާއި ދުނިޔެއާ ދެމެދު އޮންނަ އަސާސީ ދަތުރުފަތުރުގެ ގުޅުން މެދުނުކެނޑި ދެމެހެއްޓުން.
• ދަތުރުތަކުގެ ކެޕޭސިޓީ ނުވަތަ ޖާގަ ކޮންޓްރޯލް ކުރުމުގެ ބާރު އިތުރުވުން.
• ދުރު ރާސްތާގެ މާކެޓްތަކަށް ފަސޭހައިން ވާސިލުވެވޭނެ މަގު ތަނަވަސްވުން.
• ބޭރުގެ ދަތިތަކާއި ހުރަސްތަކުން ކުރިމަތިވާ ނުރައްކާތަކުން ރައްކާތެރިވުމުގެ ގާބިލުކަން އިތުރުވުން.
ގައުމީ އެއަރލައިން ވަރުގަދަކުރުމަކީ ހަމައެކަނި ފަޚުރަކަށްޓަކައި ކުރާ ކަމެއް ނޫނެވެ. އެއީ ގައުމުގެ މައިގަނޑު އާމްދަނީ ރައްކާތެރިކޮށް ދެމެހެއްޓުމަށްޓަކައި ކުރަންޖެހޭ މަސައްކަތެކެވެ
ސްޓްރެޖިކް މުހިންމު ދަނޑިވަޅެއް
މެދުއިރުމަތީގައި މިހާރު ހިނގަމުންދާ ހަމަނުޖެހުންތަކުގެ ސަބަބުން މިދަނޑިވަޅުގައި ފަތުރުވެރިކަމަށް ބޮޑެތި ގޮންޖެހުންތަކެއް ކުރިމަތިވެފައި ވިޔަސް މިއީ ރާއްޖޭގެ ދުރުރާސްތާގެ ސިޔާސަތުތައް އަލުން މުރާޖައާ ކުރުމަށް ލިބޭ މުހިންމު ފުރުސަތެކެވެ. މި ދަނޑިވަޅުން އެނގިގެންދަނީ، ގޮންޖެހުންތަކުން އަރައިގަތުމަށް ހަމައެކަނި އެއަރޕޯޓްތަކެއް ތަރައްގީ ކުރުމަކުން ނުފުދޭ ކަމެވެ. އެކަމަށްޓަކައި އޮޕަރޭޝަނަލް ގާބިލުކަންވެސް އިތުރުކުރަން ޖެހޭ ކަމެެވެ
ފަތުރުވެރިކަމަށް ބަރޯސާވެފައިވާ ގައުމަކަށް، ވައިގެ މަގުން ދަތުރުފަތުރު ކުރުމުގެ ދާއިމީ އަދި ހަރުދަނާ ނިޒާމެއް އޮތުމަކީ ކޮންމެހެން ބޭނުންތެރި ކަމެކެވެ. ރާއްޖޭގެ އިގްތިސާދީ މުސްތަގުބަލު ކަށަވަރުކުރަން ބޭނުންނަމަ، އެއަރޕޯޓް ތަރައްގީކުރުމާ އެއްވަރަށް ގައުމީ އެއަރލައިން ވަރުގަދަކުރުމަކީ އިސްކަންދެވޭ ކަމަކަށް ހަދަންޖެހެއެވ
މިއީ ހަމައެކަނި ކުރިމަތިވި ކާރިސާއެއް ނޫނެވެ. މިއީ ދެވުނު އިންޒާރެކެވެ. އަދި ފިޔަވަޅު އެޅުމަށް ލިބުނު ފުރުސަތެއްވެސް މެއެވެ
Comments